بریتانیا: تاوانه‌كانی‌ دژ به‌ئیسلام 70% زیادیكردووه‌

له‌ماوه‌ی‌ ساڵی‌ رابردوودا دوژمنایه‌تیكردنی‌ ئیسلام به‌ڕێژه‌ی‌ 70% زیادیكردووه‌‌و ژنانیش ئامانجی‌ سه‌ره‌كی‌ هێرشه‌كان بوون.

به‌گوێره‌ی‌ داتاو زانیارییه‌كانی‌ پۆلیسی‌ له‌نده‌نی‌ پایته‌ختی‌ بریتانیا تاوانه‌كانی‌ دوژمنایه‌تیكردنی‌ ئیسلام له‌ماوه‌ی‌ ساڵی‌ رابردوودا به‌ڕێژه‌ی‌ 70% زیادیكردووه‌. به‌گوێره‌ی‌ ئاماره‌كانی‌ 12 مانگی‌ رابردوو تامانگی‌ ته‌مموزی‌ رابردوو 816 تاوانی‌ دوژمنایه‌تیكردنی‌ ئیسلام ئه‌نجامدراوه‌، به‌به‌راورد به‌ 478 تاوان له‌ 12 مانگی‌ پێش ساڵی‌ رابردوو.

"تیل ماما" كه‌ڕێكخراوێكه‌ به‌دواداچوون بۆ هێرشه‌كانی‌ دژ به‌ئیسلام ده‌كات ده‌ڵێت: ژنان ئامانجی‌ سه‌ره‌كی‌ ئه‌و هێرشانه‌بوون كه‌كراونه‌ته‌سه‌ر موسوڵمانانی‌ بریتانیا‌و ژنه‌ په‌چه‌داره‌كان(ده‌موچاو داپۆشراوه‌كان) زۆرترین هێرشیان كراوه‌ته‌سه‌ر.

پۆلیسی‌ پایته‌ختی‌ بریتانیا تاوانه‌كانی‌ دوژمنایه‌تیكردنی‌ ئیسلام وه‌كو تاوانگه‌لێك هه‌ژمارده‌كات كه‌ئامانج لێی‌ كاریگه‌ریی‌ درووستكردنه‌ له‌سه‌ر موسوڵمانان.

Tweet